خورشید شاہ اس ٹولےکاحصہ ہیں جس نے ملک کو کنگال کیا، گورنر سندھ

پنوں عاقل: گورنر سندھ عمران اسماعیل کا کہنا ہے کہ خورشید شاہ اس ٹولے کا حصہ ہیں جس نے قوم کا پیسہ دونوں ہاتھوں سے لوٹا اور ملک کو کنگال کیا ہے۔ 

پنوں عاقل میں صحافیوں سے بات کرتے ہوئے گورنر سندھ عمران اسماعیل کا کہنا تھا کہ سندھ کے حالات انتہائی قابل رحم ہیں، سڑکوں اور اسپتالوں کا بہت برا حال ہے، صحت سمیت تعلیم کے ادارے تباہی کے دہانے پر ہیں۔ ان کا کہنا تھا کہ جن لوگوں نے ملک کو کھو کھلا کیا ہے، پاکستان کی دولت کو لوٹا ہے، ان سے رقم نکلوانے کا وقت آ گیا ہے۔ خورشید شاہ اس ٹولے کا حصہ ہیں جس نے قوم کا پیسہ دونوں ہاتھوں سے لوٹا، ملک کو کنگال کیا اور پیسے باہر بھیجے، اس ٹولے سے ہی جے آئی ٹی کی کہانی کی ابتدا ہوتی ہے۔

گورنر سندھ عمران اسماعیل نے کہا کہ کون کہتا ہے کہ عمران خان کی حکومت ناکام ہے، 4 ماہ کے دوران بہتر کام کرکے دکھایا ہے اوراثرات جلد سامنے آئیں گے، عوام پرامید رہیں کہ آنے والا وقت بہت بہتر ہوگا۔

The post خورشید شاہ اس ٹولےکاحصہ ہیں جس نے ملک کو کنگال کیا، گورنر سندھ appeared first on ایکسپریس اردو.

from ایکسپریس اردو http://bit.ly/2Vkz1Be