عمران خان کے خلاف ووٹ کی رازداری پامال کرنے سے متعلق کیس کا فیصلہ محفوظ

 اسلام آباد: ووٹ کی رازداری پامال کرنے سے متعلق کیس میں عمران خان نے بیان حلفی جمع کرادیا ہے جب کہ الیکشن کمیشن نے کیس کا فیصلہ محفوظ کرلیا ہے۔

چیف الیکشن کمیشن کی سربراہی میں 4 رکنی بنچ نے چیئرمین تحریک انصاف عمران خان کے خلاف ووٹ کی رازداری پامال کرنے سے متعلق کیس کی سماعت کی، اس موقع پر عمران خان کے وکیل بابر اعوان الیکشن کمیشن میں پیش ہوئے اور عمران خان کا بیان حلفی جمع کرایا جس میں چیئرمین تحریک انصاف نے الیکشن کمیشن سے غیر مشروط معافی مانگتے ہوئے کہا ہے کہ میرے خلاف نوٹس کو ختم کیا جائے۔

عمران خان کا بیان حلفی؛

عمران خان کی جانب سے جمع کرائے گئے تحریری بیان میں کہا گیا ہے کہ جان بوجھ کر قانون کی خلاف ورزی نہیں کی، غیر ارادی طور پر ہونے والی خطا پر معافی مانگتا ہوں جب کہ آئین و قانون کی مکمل پاسداری پر یقین رکھتا ہوں، پولنگ اسٹیشن پر بہت زیادہ رش تھا اور میں تنہا پولنگ اسٹیشن کے اندر گیا جہاں پولنگ اسٹاف سے مہر لگانے کی جگہ کے بارے دریافت کیا، عملے نے مجھے کہا کہ پولنگ بوتھ گر گیا ہے آپ یہی پر مہر لگائیں جس پر میڈیا نے فوٹیج بنائی۔

چیئرمین تحریک انصاف عمران خان کی جانب سے بیان حلفی جمع کرائے جانے کے بعد الیکشن کمیشن نے فیصلہ محفوظ کر لیا جو ایک گھنٹے بعد سنایا جائے گا۔

اس خبر کو بھی پڑھیں : ووٹ کی رازداری ظاہرکرنے کا معاملہ؛ عمران خان سے جواب طلب

کیس کا پس منظر؛

واضح رہے کہ 25 جولائی کو عمران خان نے میڈیا کے سامنے بیلٹ پیپر پر بلے کے نشان پر ٹھپہ لگا کرضابطہ اخلاق کی خلاف ورزی کی تھی جس پر الیکشن کمیشن آف پاکستان نے چیئرمین پی ٹی آئی عمران خان کو طلب کرلیا تھا۔ ووٹ کی رازداری کوافشاں کرنے پر6 مہینے قید اور ایک ہزار روپے جرمانہ کی سزا مقرر ہے۔

The post عمران خان کے خلاف ووٹ کی رازداری پامال کرنے سے متعلق کیس کا فیصلہ محفوظ appeared first on ایکسپریس اردو.

from ایکسپریس اردو https://ift.tt/2Me2viq